Llyfrgell Genedlaethol Cymru

Mae amrywiaeth helaeth o archifau a llawysgrifau yn y Llyfrgell, ac mae’r dogfennau a geir ynddynt yn amrywiol o ran maint, testun a diwyg. O siarteri canoloesol Abaty Sistersaidd Ystrad Marchell i gofnodion diweddar Eisteddfod Genedlaethol Cymru, o archif wleidyddol y diweddar Gwynfor Evans i lyfrau lloffion y paffiwr Freddie Welsh, ac o ewyllysiau’r werin i drysorau cenedlaethol, mae’r archifau yn Llyfrgell Genedlaethol Cymru yn cynnwys gwybodaeth amrywiol ym mhob maes.