CLOCH: Gwarchod Treftadaeth Cymunedau Lleol
Mae prosiect Gwarchod Treftadaeth Cymunedau Lleol (CLOCH) yn rhan o raglen ‘Sgiliau ar gyfer y Dyfodol’ Cronfa Dreftadaeth y Loteri ac mae wedi darparu cyfleoedd hyfforddi seiliedig ar waith i 16 o ddeiliaid bwrsariaethau dros dair blynedd. Mae CLOCH yn brosiect partneriaeth, dan arweiniad Archifau Morganwg, sy’n dod â llyfrgelloedd, archifau ac amgueddfeydd ledled De Cymru ynghyd i gynnig lleoliadau a phrofiad gwaith yn y sector treftadaeth.
Mae pedwar carfan o hyfforddeion wedi cael eu recriwtio drwy gydol cyfnod y prosiect. Mae pob carfan yn dechrau gyda chyfnod sefydlu o dri mis yn Archifau Morganwg, ac yna amrywiaeth o leoliadau mewn llyfrgelloedd, archifau neu amgueddfeydd partner. Drwy gydol y flwyddyn, bydd hyfforddeion yn gweithio tuag at gymwysterau perthnasol ac yn meithrin eu gwybodaeth a’u sgiliau mewn pedwar prif faes:
• Digideiddio
• Ymchwil a Hanes Lleol
• Cadwraeth a Rheoli Casgliadau
• Ymgysylltu â’r Gymuned
Mae prosiect CLOCH yn targedu dynion o dan 30 oed. Mae’r Hyfforddiant Gweithredu Cadarnhaol hwn yn galluogi dynion ifanc i ennill profiad mewn sectorau galwedigaethol lle maent yn dangynrychioli.
Mae hyfforddeion CLOCH wedi cyfrannu at bob maes gwaith yn Archifau Morganwg. Maent wedi cynorthwyo gydag ymholiadau a chynhyrchu dogfennau yn yr ystafell chwilio, wedi helpu gydag ymweld â grwpiau ysgol, wedi glanhau ac ailbecynnu cofnodion, wedi cynorthwyo gyda chatalogio deunydd newydd, ac mae eu sgiliau digideiddio newydd wedi bod yn arbennig o ddefnyddiol wrth wneud ein daliadau ffotograffig ar gael ar-lein trwy ein catalog, Canfod.
Cwrdd â’r hyfforddeion
Tom May, Hyfforddai ym Mhrifysgol De Cymru ac Amgueddfa Stori Caerdydd
Gadewais y chweched dosbarth yn 2011, yn ansicr ynghylch pa lwybr gyrfa roeddwn i eisiau ei ddilyn. Fel y rhan fwyaf o bobl fy oedran, allwn i ddim fforddio bod yn ffyslyd gan fod llawer o gystadleuaeth hyd yn oed gyda swyddi sylfaenol ac fel rhywun a adawodd yr ysgol yn ddiweddar, doedd gen i ddim llawer o brofiad i’m helpu.
Rydw i wedi bod â diddordeb yn fy nhreftadaeth a hanes yn gyffredinol ers pan oeddwn i’n ifanc iawn, felly pan glywais i am brosiect CLOCH roedd yn ymddangos yn berffaith i mi gan y byddwn i’n gallu cael blwyddyn o brofiad yn y sector a chymhwyster gydag ef. Hyd yn hyn mae wedi rhagori ar fy nisgwyliadau ac wedi rhoi cipolwg gwerthfawr i mi ar y sector treftadaeth trwy waith yn Archifau Morganwg, Prifysgol De Cymru ac Amgueddfa Stori Caerdydd. Rydw i wedi cwrdd ag amrywiaeth o bobl newydd ac wedi cael y cyfle i fynychu pob math gwahanol o hyfforddiant ac ennill sgiliau mewn meysydd nad oeddwn i’n eu disgwyl fel digideiddio.
Gyda dim ond ychydig fisoedd ar ôl, rwy’n hyderus y bydd y profiad hwn o fantais fawr i mi wrth i mi geisio sefydlu gyrfa yn y sector hwn. Mae prosiect CLOCH wedi rhoi cyfle i mi na fyddwn wedi’i gael fel arall ac rwy’n ddiolchgar i bawb a fu’n rhan o’i drefnu a’i ariannu!
James Hamill, Hyfforddai yn Archifau Gwent
Ar ôl gorffen fy TGAU yn 2003, gweithiais yn llawn amser wrth gwblhau fy Lefel A mewn Iaith Saesneg, Llenyddiaeth Saesneg a Hanes. Ar ôl hyn, parhaais i weithio’n llawn amser mewn amrywiaeth o swyddi, yn amrywio o ganolfan cartio i weithio i ddau fanc stryd fawr, trwy gwmni yswiriant ceir a busnes y teulu. Ar yr adeg hon, roeddwn i’n teimlo’n rhwystredig oherwydd diffyg llwybr gyrfa wedi’i ddiffinio, felly daeth darganfod am raglen CLOCH ar yr amser perffaith.
.
Rydw i wastad wedi mwynhau ymweld ag amgueddfeydd a llyfrgelloedd, gyda’r sector treftadaeth yn gyffredinol yn wirioneddol ddiddorol i mi. Roedd y cyfle i gyfuno gweithio mewn sector rydw i wastad wedi’i fwynhau ar lefel bersonol, â dysgu sgiliau newydd a dal i weithredu mewn rôl gwasanaeth cwsmeriaid fel rydw i wastad wedi’i wneud o’r blaen yn gyfle na allwn ei golli.
Ers hynny, rydw i wedi dysgu amrywiaeth eang o sgiliau newydd, fel digideiddio, cadwraeth a rheoli cofnodion. Rydw i wedi gallu rhoi’r rhain ar waith yn ystod fy amser yma yn Archifau Gwent, gyda ffocws penodol ar ddigideiddio, rheoli cofnodion a gweithio yn yr ystafell ymchwil, gan helpu aelodau’r cyhoedd gydag ymholiadau ac ymchwil i’w gorffennol eu hunain. Rydw i wedi mwynhau’r misoedd diwethaf yma yn fawr iawn, a gobeithio y bydd y profiad hwn yn arwain at yrfa hir a llwyddiannus mewn sector gwirioneddol ddiddorol.
Gallwch ddysgu mwy am brosiect CLOCH yn:
http://www.glamarchives.gov.uk/content.asp?nav=2,45&parent_directory_id=1
A gallwch ddilyn yr hyfforddeion ar Twitter (@cloch_skills) a Facebook (www.facebook.com/CLOCHTraineeships)